Зь Сібіры

Дзе Айчыны
Вольнасьць залатая?
На чужыне —
Тут тайга сівая,
Тут віхуры
Сьнежныя над намі
На хаўтуры
Звоняць кайданамі.

Тут сканчэньне
Катаржных этапаў
У здранцьвеньні
Выстылых баракаў,
Тутка плачу
Пра дзяцей, пра матак
Не прабачыць
Унтэр прыганяты.

Паланёны
Браце, сьцісьні зубы —
Па-над Нёмнам
Рэй вядзе загуба:
За маскaлем,
За разборам шляхты
Скрозь паўсталі
Шыбеніцаў машты.

Бо зраклася
Нашай справы ўдача —
Прадалася
У баі гарачым,
Лiтву катам
На спажыў пазбыла,
Арлянятам
Абпаліўшы крылы.

Зваяваны
Край, калісь свабодны,
Мо, выгнаньнік
З попелішчаў родных
У Парыжы
Выдасьць успаміны,
Як бяз крыжа
У зямлю сышлі мы.

19.IX.2019